للمشاهدة والتحميل اضغط هنا
ملخص قصة فيلم مين يصدق 2024
فيلم مين يصدق 2024: ببساطة شديدة، عارف المثل اللي بيقول “رب صدفة خير من ألف ميعاد”؟ المثل ده مش مجرد كلام بيتقال وخلاص، ده فعلاً واقع بيغير حياة ناس كتير، ومرات الصدفة ممكن تقلب حياة إنسان 180 درجة، يا إما ترفعه فوق وتفتح له أبواب عمره ما كان يحلم بيها، يا إما تنزله تحت وتكسره وتخليه يندم على اليوم اللي حصلت فيه. والصدف ساعات بتجمعك بناس عمرك ما كنت تتخيل تقابلهم، يدخلوا حياتك من غير ما يخبطوا على الباب، من غير ما ياخدوا إذنك، فجأة تلاقيهم قدامك، يا إما يبقوا سبب فرحتك وسندك، يا إما يبقوا بداية لسلسلة وجع ومشاكل مالهاش آخر. ونادين وباسم كانوا أكبر دليل على الكلام ده، الاتنين اللي الصدفة لعبت لعبتها معاهم، وجمعتهم من غير ميعاد، ومن اللحظة الأولى محدش فيهم كان يتخيل إن حياتهم هتتشقلب بالشكل ده، البداية كانت مشوقة ومليانة تفاصيل تشد أي حد يسمعها، لكن النهاية كانت صدمة كبيرة، وجامدة لدرجة إن أي عقل طبيعي مش هيصدقها، بس دي الحكاية، ودي البداية.
نادين بنت من النوع اللي تقول عليها طائشة، دماغها ناشفة، وما بتمشيش غير ورا اللي هي عايزاه من غير ما تسمع لحد، لا غلط ولا صح فارق معاها، هي عايزة كده وخلاص. بالرغم من إن باباها موفرلها كل حاجة، فلوس، راحة، بيت كبير، وكل سبل الرفاهية، إلا إن العلاقة بينهم كانت دايمًا مشدودة، مليانة مشاكل وخناق، خصوصًا إنه كان شايف تصرفاتها دي عيب وكسرتله راسه قدام الناس. كان بيزعق ويثور ويشد عليها، وهي ما كانتش بتهتم، بالعكس كل ما يضغط عليها أكتر، هي بتزيد عناد أكتر، لحد ما العلاقة بينهم اتقطعت خيوطها، وما بقاش في بينهم غير مشاكل على طول. واللي كان مهون عليها عيشتها دي، كريمة، الست البسيطة اللي شغالة معاهم في البيت، كانت بمثابة أم وصاحبة وأخت في نفس الوقت، وهي الوحيدة اللي نادين بتحس براحة في وجودها. لكن الدنيا مش بتمشي زي ما إحنا عايزين، باباها لما لقى كريمة كبرت في السن وبدأت تخرف شوية، وداها على دار مسنين من غير ما يسأل نادين حتى رأيها، وده زود الطين بلة وخلى نادين تكره البيت أكتر، لأنها ما كانتش مستحملة تعيش فيه من غير كريمة.
الموضوع مش بس مشاكل مع باباها، لأ كمان كان عندها وجع تاني اسمه ياسين، الأكس بتاعها اللي حبتُه بجد وتعلقت بيه لدرجة إنها كانت شايفة فيه كل حياتها، وفجأة من غير مقدمات، سابها وراح يكراش على صحبتها! الصدمة كانت أقوى من قدرتها على التحمل، وخلت قلبها يتكسر مرتين: مرة من حبيب خذلها، ومرة من صاحبة خانتها. ومن كتر القرف اللي حاوطها، ما لقتش غير طريق الهروب، تسهر، تشرب، تضحك وتلهي نفسها لحد ما تسكر وتفقد وعيها، والغريب إنها كانت بتروح تسكر في نفس المكان اللي ياسين وصاحبته بيتسهروا فيه! تقولش بتجلد نفسها بإيدها. لدرجة إنها في ليلة كانت مش مصحصحة وهي سايقة، كانت ماسكة التليفون ومش مركزة، راحت داخلة في عربية قدامها، ومن اللحظة دي بدأت اللعبة تتغير.
الراجل اللي خبطته نزل عليها مسح بيها الأرض، كلامه زي السكاكين، فضايحها في نص الشارع قدام الكل، لولا إن باسم ظهر فجأة، دخل في النص، فضّ المشكلة، وأنقذها من فضيحة أكبر. نادين اتلخبطت، مش عارفة تشكره إزاي، قالت له: اطلب اللي إنت عايزه، عينيا ليك. باسم ابتسم ابتسامة خفيفة، وقال لها: أنا ما عملتش حاجة، أهم حاجة عندي إنك بخير. ومن هنا، الشرارة اشتعلت. نادين حسّت إنها مدينة له، فقررت تتابعه من بعيد وتشوفه رايح فين.
ومن هنا بدأت القصة تتعمّق. لقت باسم داخل صيدلية، طالع متضايق، باين عليه مهموم. قربت منه، سألت، لقت إن حكايته إنه بيدور على علاج لجدته المريضة في المستشفى ومش لاقيه. ودخلت معاه المستشفى، شافت بعينيها قد إيه بيحب الست دي، وبيحاول يتكلم معاها وهي غايبة عن الوعي. المشهد لمس قلبها، وقررت تساعده، خصوصًا لما عرفت إنه محتاج مبلغ مش كبير بالنسبة لها — خمسة آلاف جنيه — فدفعتهم له من غير تفكير. كانت فاكرة إنها بتعمل خير، لكن الخير ده فتح على دماغها أبواب جهنم.
باسم ما كانش مجرد حفيد بيحب جدته. الحقيقة إنه نصاب محترف، والست اللي في المستشفى ما ليهاش أي علاقة بيه. كان بيستخدمها مجرد وسيلة عشان يضحك على الناس ويستعطفهم ويلم فلوس. نادين لما اكتشفت الموضوع، ما استسلمتش، بالعكس، قررت تمشي معاه في السكة دي، واتحدته إنها عايزة تتعلم منه وتبقى زيه، ولو رفض هتفضحه. ومن هنا اتولد الثنائي الأخطر: باسم ونادين. ومع كل يوم، كل خطة نصب جديدة، كانوا بيقربوا من بعض أكتر، لدرجة إنهم بقوا شبه شركاء روح مش بس شركاء شغل. لكن السكة دي ما بتمشيش غير في اتجاه واحد: الكارثة.
ابطال فيلم مين يصدق 2024
يشارك في الفيلم يوسف عمر في دور “باسم”، وچيدا منصور بدور “نادين”، بينما يظهر أشرف عبدالباقي كضيف شرف في شخصية “رشدي” التي يقدمها شريف منير، إلى جانب أحمد رزق وسليمان عيد أيضًا كضيوف شرف. كما يضم العمل عارفة عبدالرسول، ومحمد عبدالعظيم، وعلي السبع في دور “ياسين”، ونبيل علي ماهر، وإبرام سمير، ونادين، ومحمد جمال قلبظ، وشريف حلمي، وهو من إخراج زينة عبدالباقي.
