للمشاهدة والتحميل اضغط هنا
قصة فيلم في عز الضهر 2025
مراجعة فيلم في عز الضهر 2025: فيلم “في عز الظهر” من تأليف كريم سرور وإخراج مرقس عادل، وبيشارك في بطولته عدد كبير من النجوم، منهم مينا مسعود في أول تجربة ليه في مصر، مع شيرين رضا، محمود حجازي، إيمان العاصي، بيومي فؤاد، محمود البزاوي، محمد عز، جميلة عوض، وضيوف شرف كتير.
قصة الفيلم بتدور حوالين “حمزة”، شاب مصري اتربى في ملجأ وواجه مشاكل كتير في طفولته. بعد كده سافر برا مصر وبقى عضو في منظمات إجرامية دولية. شخصيته كانت محيرة، والفيلم ما وضّحش التفاصيل دي بشكل كافي، لكن الواضح إن في جهات كبيرة في العالم بتدور عليه، وليه عملية خاصة في مصر متعلقة بقائمة معينة، وبتبدأ الأحداث تتطور من هنا.
الفيلم فيه عناصر أكشن كويسة، وده من الحاجات الإيجابية اللي كانت واضحة، والمخرج اجتهد فيها. مينا مسعود، إيمان العاصي، ومحمود حجازي قدموا مشاهد أكشن متقنة، بس في بعض المشاهد كانت المؤثرات الصوتية فيها مبالغ فيها، وممكن تتسبب في ضحك غير مقصود بسبب الأصوات الغريبة.
من ضمن الإيجابيات كمان وجود طاقم تمثيل كبير، ومينا مسعود تحديدًا كان ملفت لأنه نجم عالمي، ودي أول مرة يشارك في عمل مصري. لكن بالرغم من ده، الفيلم كان فيه مشاكل كتير، أهمها السيناريو. فيه خطوط درامية كتير متشابكة، وشخصيات كتير ظهرت من غير عمق كافي، والعلاقات بينهم ما كانتش واضحة، زي مثلًا علاقة الحب بين مينا مسعود وجميلة عوض اللي ما كانش فيها أي كيمياء.
كمان فيه محاولة لإدخال رسائل وطنية وخطابات مباشرة، لكن من غير توظيف كويس، وده خلّى الفيلم يظهر كأنه مش عارف يحدد نوعه: أكشن؟ وطني؟ درامي؟ الحكاية مش واضحة.
الفيلم بيعرض كمان على خطين زمنيين، لكن فيه تفاصيل زي استخدام موبايل بلاك بيري، خلت المشاهد يحس إن الأحداث قديمة، رغم إن مكتوب “القاهرة الآن”، وده عمل نوع من التشتت.
فيه تحولات غير مبررة في بعض الشخصيات، زي شخصية محمود البزاوي، اللي بتتغير من طيب لشرير وبترجع تاني، من غير تمهيد مقنع. كمان نهاية الفيلم فيها التوست أو المفاجأة الدرامية، بس كانت متوقعة جدًا.
واضح إن المونتير حاول يستعرض مهاراته بشكل مبالغ فيه، خصوصًا في مشاهد الأكشن اللي فيها تقطيع كتير، زي مشهد نطة بتتكرر من كذا زاوية، وده ما كانش ليه لازمة.
الكاتب كريم سرور، اللي ظهر كممثل قبل كده في مسلسل “الصندوق”، كتب الفيلم ده، ويُقال إنه كتب مسلسل تاني قبل كده اسمه “أسود باهت”. وواضح إن الفيلم متصور من فترة، لأن بيومي فؤاد في الفيلم كان تخين، وهو دلوقتي أرفع بكتير.
الفيلم كان فيه شخصيات كتير أوي وخطوط كتير، وكان ممكن يشتغل كمسلسل أحسن عشان يقدر يغطي كل ده من غير استعجال. شخصية زي محمد علي رزق مثلًا، اللي كان بيجسد دور صحفي، مش واضح إذا كان دوره واقعي ولا خيالي، لأن النوع ده من الصحفيين مش موجود فعليًا في مصر.
في النهاية، الفيلم كان محتاج تركيز أكتر على السيناريو، وتخفيف عدد الخطوط الجانبية، وكمان تقليل الاستعراضات في المونتاج. التجربة فيها مجهود، بس محتاجة توجيه وتنظيم أكتر علشان تطلع بشكل أفضل.
ابطال فيلم في عز الضهر
بيشارك في فيلم في عز الظهر عدد كبير من النجوم، على رأسهم مينا مسعود في دور “حمزة الكاشف”، وشيرين رضا في دور “برناديت”، ومحمود البزاوي في دور “بكر”، وجميلة عوض في دور “ريم”، وبيومي فؤاد في دور “شريف اللحياني”، وإيمان العاصي في دور “ساندرا”، ومحمود حجازي في دور “ديفو”، ومحمد علي رزق في دور “مراد الصحفي”، وأحمد علي في دور “الرائد ماجد”، ومحمد عز في دور “ربيع”. كمان الفيلم بيضم ضيوف شرف زي صبري عبد المنعم في دور “حسن الكاشف”، وعلاء قوقة في دور “محسن الكاشف”، ونانسي صلاح في دور “دانا”، ونضال الشافعي، وياسر علي ماهر في دور “لواء شرطة”، بالإضافة لكريم سرور اللي بيجسد شخصية “أفلاطون”، وإيهاب فهمي في دور “منير”.
افلام مصرية
