للمشاهدة والتحميل اضغط هنا
قصة فيلم الشاطر 2025
فيلم الشاطر 2025 امير كرارة وهنا الزاهد: بيبدأ بشخصية “أدهم الشاطر”، مؤدي حركات خطيرة في أفلام الأكشن، لكنه بيعاني في شغله بسبب عصبيته الزايدة. فجأة بيتحط في أزمة لما أخوه “عصفورة”، اللي كان بيصور فيديوهات لايف من تركيا، بيتخانق مع واحد من حراس مكان حساس، واللايف بيتقطع فجأة. بعدها بيظهر في لايف قصير جدًا وبيقول إنه اتخطف.
أدهم بياخد صاحبه “فتوح” وبيسافروا سوا على تركيا علشان ينقذوا “عصفورة”. وهناك بيتورطوا في مشاكل مع واحد من رجال العصابات الكبار، وبيلاقوا نفسهم مطاردين، وبيحاولوا يهربوا ويستخبوا. في لحظة من اللحظات، ووسط كل ده، بيظهر فيديو لمصطفى غريب – اللي عامل دور “فتوح” – وهو بيرقص في فرح، وده بيكشف مكانهم. المفارقة هنا إن الشخصية نفسها بتتفضح بسبب فيديو هو نفسه كان فيه.
أسلوب الكوميديا في الفيلم بيعتمد على الإفيهات والمواقف بشكل مكثف جدًا، شبه ما يكون رشاش بيدرب نكت من أول دقيقة لآخر دقيقة. بعض اللحظات فعلاً كانت مضحكة، وده راجع لخفة دم الأبطال وحضورهم، لكن للأسف النسبة الأكبر من النكت كانت طفولية ومتعمدة الكمية على حساب الجودة.
أغلب الكوميديا في النصف الأول من الفيلم كانت لفظية، وأحيانًا معتمدة على المواقف السخيفة والردود الغبية للشخصيات، واللي بتخلي “أدهم” ينفجر غضب ويبدأ يلطش في اللي حواليه. ده نوع من الكوميديا المصرية التقليدية، اللي بقت قديمة ومستهلكة، ومبقاش ليها تأثير زي زمان.
الأكشن في الفيلم معمول بشكل كويس جدًا، وده يخلينا نفتكر فورًا فيلم “أحمد وأحمد”، لأن فيه تشابه كبير، خصوصًا في مشهد مطاردة العربيات. لكن المختلف هنا إن الكوميديا بقت ملزوقة على الأكشن، مش متفصلة معاه. مصطفى غريب في مشهد المطاردة، كان قاعد في العربية بيكلم صاحبات أمه وبيعتذر لهم إنه كان بيسرقهم في الجمعيات. المشهد ده كان حلو فعلًا، والإفيهات كانت أحسن من مثيلاتها في أفلام تانية.
النصف التاني من الفيلم بيبدأ يتحسن. القصة بتتعقد شوية، وبيبان إن فيه حبكة، مش مجرد نكت مرمية. بتظهر شوية مفاجآت، وبتزيد الشخصيات اللي بتشارك في الكوميديا، وده بيخلي المواقف تبقى أذكى وتطلع ضحك أحلى، خصوصًا لما كل شخصية بتبني على رد فعل التانية. فيه مشهد أكشن كوميدي في النص التاني كان فعلاً مضحك جدًا، شخصيات لابسة لبس غريب، بيواجهوا عصابة، والمشهد كله متصمم عشان يضحك فعلاً، ونجح.
الكويس كمان إن الفيلم أخدنا في أكتر من موقع، فتنوع المناظر وجودة التصوير خلوا التجربة لطيفة. فريق البطولة بالكامل كان خفيف، وماكانش فيهم حد تقيل الدم. باستثناء شوية مشاهد فيها “تلطيش” من أمير كرارة، كانت مش مضحكة وممكن ما تتحبش، لكنها كانت مبررة جوه السياق.
النقطة الأقوى في الفيلم هي إن مصطفى غريب أخيرًا خد مساحة حقيقية يشتغل فيها، وده مكسب كبير. دوره في النص الأول شال الفيلم بالكامل، وطريقته في الأداء كانت شبه شخصية “عربي” من مسلسل “أشغال شقة”، فيها تفاصيل وشغل واضح. أحمد عصام السيد كمان كان كويس، وهنا الزاهد قدمت أداء خفيف، والضيوف الشرف كانوا قليلين لكن ظهورهم في الآخر كان مفاجئ وحلو.
الفيلم مناسب للعيلة، وممكن فعلًا تستمتعوا بيه لو دخلتوا وانتوا على نفس موجة الكوميديا اللي بيقدمها. لو حسيت إنك مش على الموجة، فممكن تبقى تجربة متعبة شوية، لكن لو ضحكت، فهتضحك من قلبك. هو مش أعظم فيلم كوميدي، لكنه ممتع وسهل، وفيه حاجات كتير تتحب.
ابطال فيلم الشاطر 2025
أمير كرارة في دور أدهم الشاطر، وهنا الزاهد في دور كراميلا، ومصطفى غريب في دور فتوح، وعادل كرم في دور عثمان الأناضولي، ومحمد القس في دور ماثيو، وخالد الصاوي في دور المعلم سمك كضيف شرف، وأحمد عصام السيد في دور عصفورة، وشيرين رضا كضيفة شرف بشخصيتها الحقيقية، ومعتز التوني أيضًا كضيف شرف بشخصيته الحقيقية، إلى جانب تميم يونس في دور نديم كضيف شرف، ومحمد عبدالرحمن في دور سواق التاكسي كضيف شرف، وأحمد مكي كضيف شرف، والفيلم من إخراج أحمد الجندي.
