للمشاهدة والتحميل اضغط هنا
قصة فيلم روكي الغلابة 2025
فيلم روكي الغلابة 2025: الفيلم بطولة دنيا سمير غانم، ومحمد ممدوح، ومحمد ثروت، ومن تأليف وإخراج أحمد الجندي. القصة بتدور حوالين “روكي”، أو زي ما بنعرفها “رُقيّة”، اللي بتتورط في مهمة خطيرة لحماية عالم كبير من عصابة بتحاول تسرق اختراع خطير له علاقة بالذكاء الاصطناعي. ومن هنا، بتبدأ الأحداث.
أكتر حاجة مميزة في الفيلم هو الكيميا الحلوة بين دنيا سمير غانم ومحمد ممدوح. دنيا بتقدم شخصية كوميدية جداً، واحدة مش بتعرف تنطق إنجليزي صح، والنقطة دي كانت مصدر كبير للكوميديا، خصوصاً لما محمد ممدوح بيكون رد فعله تلقائي وطبيعي. محمد ثروت برضو بيظهر في بعض المشاهد، وبيقدم ضحكته المعتادة، بس مش دايمًا موجود في الأحداث.
على مستوى التمثيل، الدنيا كانت ماشية كويس. دنيا قدمت أداء ظريف جدًا، ومحمد ممدوح كان موفق جدًا في الدور، خصوصًا إنه بيجسد شخصية جبانة وعكس المتوقع. فيه ضيوف شرف كمان زي إيمي سمير غانم، وأحمد الفيشاوي، وأحمد طلعت اللي عمل دور الشرير.
الإخراج بقى كان من أحسن الحاجات في الفيلم. أحمد الجندي قدم شغل كويس جدًا في تنظيم المشاهد، واختيارات الموسيقى كانت موفقة جدًا في مشاهد معينة. خصوصًا اللي فيها دنيا ومحمد ممدوح بيعملوا حاجات غريبة من غير ولا كلمة، والموسيقى كانت بتكمل الإفيه بدل ما تكون بس خلفية.
لكن طبعًا الفيلم مش خالي من العيوب. أولها إن في مشاهد كتير جدًا فيها موسيقى تصويرية، وده بقى مرهق شوية. أوقات كان المفروض نسمع الحوار من غير أي مؤثرات. وكمان مش كل الكوميديا كانت بتضحك، فيه مشاهد حسيت إن القلش فيها مش دايمًا موفق.
أما عن الأكشن، فده كان أضعف نقطة. طبيعي إن دنيا مش هتعمل كل مشاهد الأكشن بنفسها، لكن في مشاهد حسيت إن التنفيذ فيها ضعيف، خصوصًا المؤثرات البصرية اللي كانت باينة إنها بدائية أوي في أول الفيلم. يمكن في النهاية كانت أحسن شوية، بس لسه محتاجة شغل أكتر.
في النهاية، فيلم “روكي الغلابة” فيلم ظريف، مناسب جدًا للعيلة. مش هو أحسن فيلم كوميدي في السنة، بس من الأفلام اللي ممكن تتشاف في السينما وتتنبسط بيها. أنا عن نفسي شُفت إن مستوى الكوميديا كان مقبول، خصوصًا لأنها عائلية ومفيهاش حاجات خارجة أو سخيفة.
لو بتحب الأفلام اللي فيها كوميديا خفيفة وكده، هتتبسط. لكن لو رايح تدور على أكشن أو كوميديا تقيلة، ممكن تحس إنه خفيف شوية. بس كفيلم عائلي؟ يعتبر واحد من أحسن التجارب الكوميدية اللي نزلت مؤخرًا.
ابطال فيلم روكي الغلابة 2025
دنيا سمير غانم في دور رقية (روكي)، ومحمد ممدوح في دور ثابت بكر، ومحمد ثروت في دور منير، وسلوى عثمان في دور نجاح، ومحمد رضوان في دور كابتن منصور، وأحمد طلعت في دور غالي، إلى جانب عدد من ضيوف الشرف منهم أحمد سعد، ومحمد أسامة (أوس أوس) في دور سواق تاكسي، وأحمد الفيشاوي في دور ديفيد، ومريم الجندي في دور سوسن الصحفية، وعبدالرحمن حسن في دور مرزوق، وإيمي سمير غانم في دور د. لوتس، والفيلم من تأليف كريم يوسف وندى عزت وأحمد الجندي، واخراج احمد الجندي.
