للمشاهدة والتحميل اضغط هنا
قصة فيلم ال شنب 2023
فيلم ال شنب 2023: فيلم ال شنب نزل مؤخرًا في السينمات بعد تأجيل طويل. الناس كانت ناسية أساسًا إنه هينزل، لكن فجأة ظهرت الدعاية من أسبوع أو اتنين، وبدأ يتعرض أخيرًا. الفيلم من بطولة عدد كبير من النجوم: ليلى علوي، لبلبة، سوسن بدر، محمود البزاوي، أسماء جلال، هيدي كرم، خالد سرحان، حسن مالك، علي الطيب، وأحمد عصام السيد. وبيحمل توقيع المخرجة والمؤلفة آيتن أمين، اللي كانت أخرجت قبل كده المسلسل الشهير “سابع جار”، وكمان فيلم “فيلا 69” بطولة خالد أبو النجا. لكن “ال شنب” يعتبر أول تجربة تجارية صريحة ليها في السينما.
فيلم ال شنب كان تجربة متضاربة، خرجت منه شايف إنه فيلم لطيف وواقعي، لكن في نفس الوقت كنت محبط، وده هشرحه بعد شوية. خليني أبدأ أولًا بإيجابيات الفيلم:
أكتر حاجة ملفتة في “ال شنب” هي واقعيته. الفيلم بيحكي عن عيلة بتتجمع في عزاء، وده الحدث الرئيسي اللي بيلم كل الشخصيات في مكان واحد. الكاميرا بتدخل معاهم البيت وبتوثق اللحظات الطبيعية اللي بتحصل بين أفراد الأسرة لما يقعدوا مع بعض يومين تلاتة: النميمة، الذكريات، الخلافات الصغيرة، والحكايات اللي كل واحد فيهم شايلها. بتحس كأن الكاميرا مركونة في الركن بتنقل كل حاجة بتحصل من غير افتعال.
المشاهد دي كانت من أكتر الحاجات الممتعة في الفيلم، لأنك بتحس إنك بتتفرج على عيلتك أو على موقف مرّ عليك. ومن هنا ييجي الجانب الإيجابي التاني، وهو التمثيل. أسماء جلال قدمت واحد من أقوى أدوارها، خصوصًا في المشهد اللي بيجمعها بليلى علوي في نهاية الفيلم، واللي قامت بدور والدتها. علاقتهم كانت معمولة بحس واقعي جدًا، وتفاصيلهم كانت مؤثرة بشكل حقيقي.
أما ليلى علوي، فبالرغم من إن أدائها كان مضبوط، إلا إنه مش من أقوى أدوارها، لكنه كان مناسب لطبيعة الفيلم. المفاجأة الحقيقية بالنسبالي كانت هيدي كرم، اللي خرجت تمامًا من قالب الأدوار اللي اتعودنا نشوفها فيها، وقدمت أداء مميز جدًا ومختلف.
على مستوى الكوميديا، أكتر ناس ضحكت معاهم كانوا أحمد عصام السيد، وخالد سرحان اللي عمل كام مشهد خفاف جدًا. وكمان لبلبة كانت لطيفة جدًا، قدمت شخصية خفيفة الدم، وحطت لمستها الجميلة على الفيلم. وسوسن بدر، كالعادة، كارزما قوية وحضور مختلف، بس للأسف شخصيتها كانت فاضية وما استُغلتش بشكل كافي.
لكن رغم ده كله، فيه سلبيات واضحة، وأهمها إن الفيلم مفيهوش “قصة”. آه، هو بيعتمد على فكرة بسيطة وموقف اجتماعي مألوف، لكن مفيش تصاعد درامي، مفيش بناء للشخصيات، ولا فيه حبكة حقيقية. الفيلم كله عبارة عن مشاهد متقطعة لعيلة قاعدة في بيت بعد وفاة حد منهم. حتى المواقف الكوميدية اللي كان ممكن تطلع من الجو ده، مكانتش كتير أو مكتوبة بشكل يخليها تعيش.
مثلاً، كان فيه مشهد في آخر الفيلم وهم بيلعبوا كورة. واضح جدًا إنه مشهد مرتجل، والمخرجة قالت لهم يتفاعلوا كأنهم بيلعبوا بجد، وده لطيف، بس برضو مش كفاية. الموقف كان ممكن يبقى أقوى بكتير لو اتوظف دراميًا.
شخصيات كتير في الفيلم كانت محتاجة تتفرد وتتشرح أكتر. زي شخصية محمود البزاوي، اللي كنت متوقع ياخد خط درامي أقوى، باعتباره ممكن يبقى بديل رمزي لشخصية خال أسماء جلال (بيومي فؤاد في حياتها). لكن الخط ده ما خدش فرصته، وتحس إن فيه مشاهد اتمسحت أو مكنتش مكتوبة أصلاً.
كمان شخصية علي الطيب، كان طول الفيلم بيقول جملة متكررة عن إنه ناوي يرشح نفسه في حاجة تخص النادي، لكن مفيش أي متابعة للخط ده، ولا عرفنا إيه الهدف منه.
نفس الكلام ينطبق على العلاقة ما بين أسماء جلال والشخص اللي بتحبه في البنك. فجأة بيقعدوا مع بعض وكأنهم في مكتب شخصي، في مشهد مش مقنع خالص، لا من ناحية المنطق، ولا من ناحية البناء.
ابطال فيلم ال شنب 2023
ليلى علوي في دور نيللي شنب، سوسن بدر في دور نبيلة شنب، لبلبة في دور نهى شنب، هيدي كرم في دور ندى شنب، وأسماء جلال في دور ليلى، إلى جانب خالد سرحان في دور محمد، ومحمود البزاوي في دور طارق، وحسن مالك في دور زياد، وعلي الطيب في دور شريف شنب، وإبتهال الصريطي في دور أم هنا، وسلافة غانم في دور أم أحمد، وهبة يسري في دور زوجة شريف، ومحمد علاء كضيف شرف في دور خالد، ونورين أبو سعدة في دور هنا، وشيرين كضيفة شرف في دور ديدي، وبيومي فؤاد في أداء صوتي لدور حسين شنب، بالإضافة إلى مروان فارس وأحمد عصام السيد.
